Kila Hatua ya Kalvari Ilikuwa ya Upendo

Katika hili tunajua upendo, kwamba yeye alitoa maisha yake kwa ajili yetu. (1 Yohana 3:16)

Upendo wa Kristo kwetu ulidhihirishwa katika kufa kwake kwa kujua, kwa sababu mateso yake yalikuwa ya makusudi. Ikiwa alikusudia kuutoa uhai wake, basi ilikuwa ni kwa ajili yetu—ilikuwa ni upendo.

“Yesu, akijua ya kuwa saa yake imefika ya kuondoka katika ulimwengu huu kwenda kwa Baba, akiwa amewapenda watu wake walio katika ulimwengu, aliwapenda hata mwisho” (Yohana 13:1). 

Kila hatua kwenye barabara ya Kalvari ilimaanisha, “Nakupenda.”

Kwa hiyo, kuhisi upendo wa Kristo katika kuyatoa maisha yake, inasaidia kuona jinsi ulivyokuwa wa makusudi kabisa.

Tazama kile Yesu alichosema baada tu ya wakati ule wa vurugu wakati Petro alipojaribu kupasua fuvu la kichwa cha mtumishi, lakini akamkata sikio tu.

Kisha Yesu akamwambia, “Rudisha upanga wako mahali pake. Kwa maana wote waushikao upanga wataangamia kwa upanga. Je, unafikiri kwamba siwezi kumwomba Baba yangu, naye ataniletea mara moja zaidi ya majeshi kumi na mawili ya malaika? Lakini Maandiko Matakatifu yatatimizwaje, kwamba lazima iwe hivyo?" (Mathayo 26:52-54) 

Ni jambo moja kusema kwamba maelezo ya kifo cha Yesu yalitabiriwa katika Agano la Kale. Lakini ni zaidi ya kusema kwamba Yesu mwenyewe alikuwa akifanya maamuzi yake kwa usahihi ili kuhakikisha kwamba Maandiko yangetimizwa. 

Yesu alifanya maamuzi sahihi ili kutimiza Maandiko kwa ajili ya upendo wake kwetu.

Hivyo ndivyo Yesu alisema alikuwa akifanya katika Mathayo 26:54. "Ningeweza kuepuka mateso haya, lakini maandiko yatatimizwaje, ikiwa ni lazima iwe hivyo?" 

Kwa maneno mengine, sichagui kuchukua njia ya kutoka ambayo ningeweza kuchukua, kwa sababu najua Maandiko. Najua ni nini lazima kitendeke ili watu wangu waokolewe. Ni chaguo langu kutimiza yote ambayo nimetabiriwa katika neno la Mungu. Ni chaguo langu - kila hatua ya njia - kuwapenda watu wangu hadi mwisho. Na ninataka wahisi hivi. Na wawe salama kabisa na huru na tofauti kabisa na ulimwengu.